ՀՀ փաստաբանների պալատը Ամերիկյան իրավաբանների ընկերակցության CEELI Inc.-ի հայաստանյան ներկայացուցչության հետ իրականացվող «Ռազմավարական դատավարությունը Հայաստանում» ծրագրով կազմակերպվող բաց դասընթացների շրջանակում 2011թ. հոկտեմբերի 20-ին ՀՀ փաստաբանների պալատի դահլիճում անց է կացրել «Վատ վերաբերմունքի մասին հայտարարությունների արդյունավետ քննության պահանջները ըստ Եվրոպական դատարանի որոշումների ու CPT-ի չափանիշների և դրանց կիրառման պրակտիկան Հայաստանում» թեմայով դասընթաց: Դասընթացը վարեց փաստաբան Տիգրան Սաֆարյանը:

Դասընթացի ընթացքում Տիգրան Սաֆարյանը ռազմավարական ծրագրում ընդգրկված Ստեփան Հովակիմյանի գործի օրինակի վրա փորձ կատարեց լսարանին ներկայացնել Մարդու իրավունքների եվրոպական դատարանի նախադեպային որոշումներով վատ վերաբերմունքի մասին հայտարարությունների արդյունավետ քննությանը ներկայացվող չափորոշիչները, ապա պատասխանեց մասնակիցների հարցերին:

Կարճ մեջբերում Ստեփան Հովակիմյանի գործի վերաբերյալ.

Ստեփան Հովակիմյանը իր վերաբերյալ քրեական գործի նախաքննության սկզբնական պահից հայտնել է, որ ոստիկանությունում տրված բացատրությունն ու ինքնախոստովանական ցուցմունքը իրենից կորզվել են բռնությունների հետևանքով, սակայն վատ վերաբերմունքի մասին նրա հայտարարությունները պատշաճ մարմինների կողմից չեն ենթարկվել մանրամասն քննության, ինչպես պահանջում են CPT–ի կողմից ընդունված և Եվրոպական դատարանի նախադեպային որոշումներով հաստատված չափանիշները: Իր վերաբերյալ քրեական գործի դատաքննության ընթացքում ևս Ստեփան Հովակիմյանը հայտնել է իր կողմից կիրառված բռնությունների մասին, բացի այդ գրավոր հաղորդում է ներկայացրել ՀՔԾ, սակայն նրա հաղորդման վերաբերյալ արդյունավետ քննություն չի կատարվել:

Ստեփան Հովակիմյանը արդեն մեկուկես տարի պայքարում է, որպեսզի համապատասխան մարմինները պատշաճ ուշադրություն դարձնեն իր նկատմամբ կիրառված ապօրինությունների և բռնությունների վերաբերյալ պնդումներին և նման գործի կարևորությունը բխում է ոչ միայն Ստեփան Հովակիմյանի շահերից, այլ իրոք ունի ռազմավարական նշանակություն հետևյալ առումներով. ներպետական կամ որևէ այլ ատյաններում բարենպաստ դատական ակտ կայացվելու դեպքում սույն գործը կարող է դրական ազդեցություն ունենալ այն անձանց կամ կազմակերպությունների վրա, որոնք որոշակի մտավախություններից ելնելով չեն բարձրաձայնում իրենց իրավունքների կոպիտ խախտման,իրենց նկատմամբ բռնությունների կիրառման մասին: Կկոտրվի այն կարծրատիպը, որ պետության, պետական մարմինների, ոստիկանության «դեմ» պայքարելն անիմաստ է, քանի որ ոչինչ չի փոխվելու:

Տես ավելին Ստեփան Հովակիմյանի գործի մասին այստեղ...