Կոտայքի մարզպետարանում այսօր՝ փետրվարի 27-ին, տեղի է ունեցել ՀՀ փաստաբանների պալատի հանրային պաշտպանի գրասենյակի Հրազդան քաղաքի նստավայրի բացման արարողությունը: Դեռևս 2018թ․ հոկտեմբեր ամսին ՀՀ փաստաբանների պալատի նախագահ Արա Զոհրաբյանի և Կոտայքի մարզպետ Ռոմանոս Պետրոսյանի միջև համագործակցության հուշագիր էր ստորագրվել: Ըստ այդ փաստաթղթի կողմերը պատրաստվում են համագործակցել մարզի բնակիչների համար իրազեկման ծրագրերի իրականացման, անվճար և արդյունավետ իրավաբանական օգնության տրամադրման ուղղություններով: Գրասենյակում քաղաքացիներին ծառայություն են մատուցելու ոչ միայն  հանրային պաշտպանները, այլ նաև այն փաստաբանները, որոնք չունեն գրասենյակային տարածք գործունեություն ծավալելու համար: Դրա փոխարեն այդ փաստաբանները շաբաթական մեկ անգամ անվճար իրավաբանական խորհրդատվություն կտրամադրեն մարզի բնակիչների համար:

 «Վստահ եմ որ այս համագործակցության շահառուն լինելու են մեր քաղաքացիները: Որքանով որ տեղյակ եմ մարզպետարան դիմող քաղաքացիների մեծ մասի խնդիրները կապված են իրավական հարցերի հետ և այս առումով այս հարթակը լավ հնարավորություն է տալիս մեր քաղաքացիներին ստանալ իրավական օգնություն և թեթևացնել պետության բեռը»,-նշել է Արա Զոհրաբյանը:

«Այս փուլում այս ֆորմատի աջակցությունը շատ կարևոր է մարզի համար և ուրախալի որ հենց ձեզ հետ ենք իրականացնում»,-հայտնել է Կոտայքի մարզպետ Ռոմանոս Պետրոսյանը:

Այսօր՝ փետրվարի 28-ին ՀՀ փաստաբանական դպրոցի իրավաբանական կլինիկան, փաստաբանների հետ իրականացնելու է անվճար իրավաբանական խորհրդատվություն Կոտայքի մարզի բնակիչների համար:

ՀՀ փաստաբանների պալատի հանրային պաշտպանի գրասենյակի Հրազդան քաղաքի նստավայրի բացման առիթով Կոտայքի մարզպետը գրասենյակին նվիրել է Աբովյան քաղաքի Գեղարվեստի ուսումնարանի սաներից մեկի գեղանկարը: