Հայաստանի Հանրապետության փաստաբանների պալատում այսօր՝ հուլիսի 10-ին, տեղի է ունեցել ՙՓաստաբան Եզեգելյանի 2015 թ. թոշակ՚ հավաստագրերի հանձնման արարողությունը: Փաստաբանների պալատը դեռևս ապրիլին հայտնել էր, որ նվիրատվության հուշագիր է կնքվել ՀՀ փաստաբանների պալատի և Ֆրանսիայի քաղաքացի ՀՀ փաստաբանների պալատի պատվավոր անդամ Ռայմոն Եզեգելյանի միջև:
Ըստ կնքված հուշագրի փաստաբան բարերար Ռայմոն Եզեգելյանը նվիրաբերելու է 80 (ութսուն) փաստաբանների համար մեկ տարվա անդամավճարների հանրագումարը։
Այսօր Փաստաբանների պալատում Ռայմոն Եզեգելյանը և փաստաբանների պալատի նախագահ Արա Զոհրաբյանը անձամբ հավաստագրերը հանձնեցին փաստաբաններին: Վերջիններս ընտրվել են որոշակի չափանիշներով. տարիքային, երրորդ խմբի հաշմանդամները, անչափահաս, երկու և ավելի երեխաներ ունեցող մարզերից փաստաբանական համայնքի ներկայացուցիչները:
Փաստաբանների պալատի նախագահ Արա Զոհրաբյանը շնորհակալական խոսքում նշել է, որ Ռայմոն Եզեգելյանը մեկ անգամ չէ՝ իր բարեգործություններով կանգնած է փաստաբանների պալատի կողքին: Նրա խոսքով համատեղ քննարկումների արդյունքում է, որ փաստաբան-բարերարը ցանկություն է հայտնել թոշակ տրամադրել մարզի փաստաբաններին: ՙԱյս թոշակի տրամադրման նպատակն է մեղմել մարզի փաստաբանների առանց այն էլ ծանր սոցիալական վիճակը և գիտեմ, որ այն դժվարությունները, որոնք առկա են Երևանում եռակի կամ քառակի են մարզերում՚,-նշել է Արա Զոհրաբյանը:
Ռայմոն Եզեգելյանն էլ իր հերթին նշել, որ մեծ ուրախությամբ է օգնում իր հայրենակիցներին և նշել որ այն կլինի շարունակական: