Ապրիլի 6-ին և 7-ին Հայաստանի Հանրապետության փաստաբանների պալատում կազմակերպվել էին «Տնտեսական մրցակցության իրավական կարգավորումը Հայաստանի Հանրապետությունում»,«Տնտեսական գործունեության դեմ ուղղված հանցագործությունների առանձնահատկությունները» թեմաներով վերապատրաստման դասընթացներ:
«Տնտեսական մրցակցության իրավական կարգավորումը Հայաստանի Հանրապետությունում» թեմայով դասընթացը վարել է ՀՀ փաստաբանական դպրոցի տնօրեն, փաստաբան, ի.գ.թ. Սիմոն Բաբայանը: 
Դասընթացի նպատակն էր զարգացնել փաստաբանների հմտությունները տնտեսական մրցակցության պաշտպանության բնագավառում: Քննարկվել են հակամրցակցային համաձայնությունների, մենաշնորհի և գերիշխող դիրքի համակենտրոնացման իրավական բովանդակությանն առնչվող խնդիրներ: Սեմինարի մասնակիցների ուշադրությունը հրավիրվել է իրավաբանական անձանց անբարեխիղճ մրցակցության հիմնահարցերին: Քննարկվել է նաև այս բնագավառում կիրառվող պատասխանատվության միջոցների վերաբերյալ փաստաբանի տեղեկացված լինելու կարևորությունը: 
«Տնտեսական գործունեության դեմ ուղղված հանցագործությունների առանձնահատկությունները» թեմայով դասընթացը վարել է ԵՊՀ դասախոս, դոցենտ, ի.գ.թ. Արսեն Նիկողոսյանը: Քննարկվել է ՀՀ քրեական օրենսգրքի 205-րդ հոդվածով նախատեսված հարկային մարմինների կողմից քրեական հետապնդման շրջանակը: Մասնակիցները մտքեր են փոխանակել տնտեսական գործունեության դեմ ուղղված հանցագործություններին առնչվող տեսական և գործնական մոտեցումների շուրջ: