ՀՀ փաստաբանների պալատի խորհրդի 19.09.2019թ. թիվ 17/16-Լ որոշմամբ 26.12.2013թ. ընդունված «Անդամավճարների, մուտքի և այլ վճարների վճարումների վերաբերյալ» կարգում կատարվել են փոփոխություններ և լրացումներ, որոնք ուղղված են՝

- փաստաբանների նկատմամբ կիրառվող անդամավճարի արտոնությունների հստակեցմանը և ընթացակարգի պարզեցմանը,
- անդամավճարի պարտքի հիմքով կարգապահական վարույթ հարուցելու վերաբերյալ կարգավորումների հստակեցմանը,
- անդամավճարի պարտքի տարաժամկետման վերաբերյալ կարգավորումների սահմանմանը,
- որոշ դեպքերում անդամավճարի պարտքի՝ դատական կարգով բռնագանձման գործընթաց սկսելուն:

Նշված որոշմամբ փոփոխվել է կարգի 13-րդ կետով կին փաստաբաններին տրվող անդամավճարի արտոնության վերաբերյալ կարգավորումները, մասնավորապես սահմանվել է, որ Կարգի 13-րդ կետի «ա» և/կամ «բ» ենթակետերում նշված արտոնություններից օգտվելու համար փաստաբանը պետք է մեկ անգամ ներկայացնի ստորագրված դիմում, որին պետք է կցված լինի՝ առնվազն երեսուն շաբաթական հղիության վերաբերյալ համապատասխան բժշկական փաստաթուղթ («ա» ենթակետում նշված արտոնության դեպքում) կամ երեխայի ծննդյան փաստաթղթի պատճենը («բ» ենթակետում նշված արտոնության դեպքում):

Նշված փոփոխության արդյունքում կին փաստաբաններին տրվող արտոնությունների էությունը չի փոխվել, այլ առավել պարզեցվել է այդ արտոնություններից օգտվելու գործընթացը, քանի որ, ըստ էության, սահմանվել է «մեկ դիմումի» սկզբունքը:

Փոփոխությունների արդյունքում առավել հստակեցվել են նաև կարգի 14-րդ կետով Պալատի խորհրդի որոշմամբ տրվող արտոնությունների տեսակները: 

Միաժամանակ, Պալատի խորհրդի 19.09.2019թ. թիվ 17/16-Լ որոշմանը Կարգի 13-րդ կետի մասով տրվել է հետադարձ ուժ և այն տարածվել է անդամավճարի արտոնությունից օգտվելու վերաբերյալ փաստաբանների կողմից 2016 թվականի հունվարի 1-ից հետո ներկայացված բոլոր դիմումների նկատմամբ՝ անկախ այն հանգամանքից, թե դիմումը նախկին կարգավորման անդամավճարի ո՞ր արտոնության համար է ներկայացվել:

2016 թվականի հունվարի 1-ից հետո մինչև Պալատի խորհրդի 19.09.2019թ. թիվ 17/16-Լ որոշման ուժի մեջ մտնելը արտոնությունից օգտվելու դիմում ներկայացրած փաստաբաններին՝ արտոնություն տրամադրելու կամ արտոնություն տրամադրելը մերժելու հետ կապված հարցերը վերանայվում են շահառու փաստաբանի դիմումի հիման վրա, որի արդյունքում կատարվում է փաստաբանների անդամավճարների վերահաշվարկ:

Կարգում փոփոխություն է կատարվել նաև անդամավճարի պարտքի հիմքով կարգապահական վարույթ հարուցելու վերաբերյալ կարգավորումներում: Մասնավորապես, սահմանվել է, որ փաստաբանի նկատմամբ բոլոր դեպքերում կարգապահական վարույթ է հարուցվում, եթե փաստաբանի անդամավճարի պարտքը գերազանցել է 60.000 (վաթսուն հազար) ՀՀ դրամը, այսինքն՝ փաստաբանը մեկ տարի անդամավճար չի վճարել:

Բեռնել «Անդամավճարների, մուտքի և այլ վճարների վճարումների վերաբերյալ» կարգի ինկորպորացված տարբերակը: