ՀՀ փաստաբանների պալատը երեկ՝ մարտի 17֊ին, ՀՀ աշխատանքի և սոցիալական հարցերի նախարարության կողմից կազմակերպած Երազանքի օր նախաձեռնության շրջանակներում հյուրընկալել էր «ՍՕՍ մանկական գյուղ Կոտայք» հիմնադրամի սաներին, ովքեր որոշել են ապագայում իրավաբան դառնալ:

     Երեխաները շրջեցին հանրային պաշտպանի գրասենյակում, որտեղ ՀՊԳ ղեկավարի առաջին տեղակալ Լուսինե Սարգսյանը ներկայացրեց հանրային պաշտպանների գործունեությունը և դատական գործերում նրանց կողմից ներկայացուցչություն կամ պաշտպանություն իրականացնելու պայմանները, խոսեց հանրային պաշտպանների կողմից մարդկանց իրավունքները պաշտպանելու կարևորության մասին:

     Փաստաբանական դպրոցում երեխաներին դիմավորեց դպրոցի փոխտնօրեն Արմեն Ասատրյանը: Նա  երեխաներին ներկայացրեց հայ մեծանուն մտածողներ Մխիթար Գոշին, Սմբատ Գունդստաբլին, որոնց նկարները փակցված են դպրոցի պատին, խոսեց նրանց դատաստանագրքերի մասին: Դպրոցի փոխտնօրեն Արմեն Ասատրյանը ապագա գործընկերներին ներկայացրեց ընդունելության կարգը, կրթական մեթոդները՝ նշելով, որ ընդունելության և որակավորման քննությունները այնպիսի մեխանիզմով են կառուցված, որ դրանք անցկացվեն առավել օբյեկտիվ և արդար:

     Շարունակելով շրջայցը ՀՀ փաստաբանների պալատի վարչական շենքում՝ երեխաները հանդիպեցին Փաստաբանների պալատի նախագահ Արա Զոհրաբյանի հետ: Երեխաների հետ զրույցի ընթացքում Արա Զոհրաբյանը պարզ օրինակներով խոսեց պետության, իրավունքի, արդարադատության համակարգում փաստաբանի կարևոր ու անփոխարինելի դերի մասին, պատասխանելով երեխաների հարցերին, պարզաբանեց, թե ինչ է անմեղության կանխավարկածը և այլն: Արա Զոհրաբյանը, որպես ավագ ընկեր, երեխաներին խորհուրդ տվեց հույսը դնել սեփական ուժերի վրա և շատ աշխատել։

      «Հաստատուն և կայուն է այն, ինչ դուք ստեղծում եք ինքներդ: Աստված Նոյին ասաց, տապան կառուցիր, որ ջրհեղեղից փրկվես: Աստված, տապան չստեղծեց, այլ թողեց, որ Նոյն ինքը կառուցի և Նոյը երկար տարիներ իր քրտնաջան աշխատանքով տապան կառուցեց և փրկվեց: Անհնարին ոչինչ չկա, իսկ դժվարությունները մարդուն միայն կոփում են», - նշեց Արա Զոհրաբյանը:

     Վերջում պալատի նախագահը երեխաներին նվիրեց  «Նոր կտակարան և Սաղմոսներ» գրքերը` հավելելով, որ աշխարհը ավելի լավ ու կատարյալ են դարձնում նախևառաջ բարությունն ու մարդասիրությունը: Նա նաև հույս հայտնեց, որ ներկաներից մեծ մասին ապագայում կտեսնի իր գործընկերոջ կարգավիճակում: