Հայրենիքի պաշտպանության համար փաստաբանների ընտանիքների զոհված անդամների հիշատակը հարգելու նպատակով  ՀՀ փաստաբանների պալատի նախագահի որոշմամբ սահմանված հարգանքի տուրք մատուցելու համար 2021 թվականի հոկտեմբերի 17-ին ՀՀ փաստաբանների պալատի կողմից կազմակերպվել էր միջոցառում:       

       Հոկտեմբերի 17-ը, Արցախյան երկրորդ պատերազմում զոհված Հրաչիկ Ավետիսյանի ծննդյան օրն է:

       Փաստաբան Մաի Հակոբյանի որդի Հրաչիկ Ավետիսյանը ավարտել էր Երևանի Բ․Ժամկոչյանի անվան թիվ 119 դպրոցի հայ-ֆրանսիական լիցեյը, Երևանի Վալերի Բրյուսովի անվան օտար լեզուների ինստիտուտի 1-ին կուրսի ուսանող էր: Մինչև պատերազմի սկսվելը պարգևատրվել էր «Քաջարի մարտիկ» կրծքանշանով: Հրաչիկ Ավետիսյանը հերոսաբար կռվել և զոհվել է Մատաղիսի ամենավտանգավոր դիրքերի խաչմերուկում՝ 2020թ. հոկտեմբերի 6-ին ԱԹՍ հարվածից:

       Փաստաբանական համայնքի ներկայացուցիչները, Հրաչիկ Ավետիսյանի դասընկերներն ու հարազատները իրենց հարգանքի տուրքը մատուցեցին հերոսի ընտանիքին՝ այցելելով Եռաբլուր զինվորական պանթեոն՝ Հրաչիկ Ավետիսյանի շիրիմին:

       Այնուհետև, ՀՀ փաստաբանների պալատի մեծ դահլիճում տեղի է ունեցել ՀՀ «Չպարտվածները» վավերագրական ֆիլմի դիտումը:

       Ֆիլմը պատմում է փաստաբանների նահատակված զավակների՝ Հրաչիկ Ավետիսյանի, Լևոն Լևոնյանի և Միքայել Դանիելյանի մասին, ովքեր անձնվիրաբար մարտնչել և անմահացել են արցախյան երկրորդ պատերազմում:

       «Առաջին հայացքից այս երեխաները, իրականում հասուն, վճռական տղամարդիկ են, ովքեր շատ ավելի բան են արել մեր և մեր երկրի համար, քան մենք բոլորս: Նրանք չեն պարտվել: Նրանք արել են ամեն ինչ, որ մենք կարողանանք ապրել և ունենալ պետականություն։ Մեր գործընկերների զավակների հիշատակը մենք միշտ վառ ենք պահելու և մեր առաքելությունն է, որպեսզի մենք միշտ հիշենք նրանց և հպարտանանք»,- իր խոսքում նշել է ՀՀ փաստաբանների պալատի նախագահ Սիմոն Բաբայանը: 

       Տեսաֆիլմի դիտումից հետո միջոցառման ներկաները հիշեցին Հրաչիկի ապրած օրերից հետաքրքիր դեպքեր, սփոփանքի ու երախտիքի խոսքեր ասեցին Հրաչիկի մորը՝ փաստաբան Մաի Հակոբյանին:

       Հ.Գ. Փաստաբանների պալատի նախաձեռնության համաձայն  ամեն տարի փաստաբանական համայնքն իր հարգանքի տուրքն է մատուցելու մեր հերոսների ընտանիքներին:

       Դիտել «Չպարտվածները» տեսաֆիլմը