Այսօր տեղի ունեցավ ՀՀ փաստաբանական դպրոցի  թվով  71 շրջանավարտներին փաստաբանական գործունեության արտոնագրերի հանձնման հանդիսավոր արարողությունը:

Միջոցառումը սկսվեց Հայաստանի Հանրապետության օրհներգի ներքո:

Բացման խոսքով հանդես եկավ և ներկաներին ողջունեց ՀՀ փաստաբանների պալատի նախագահ Սիմոն Բաբայանը:

Դիմելով հավակնորդներին` Փաստաբանների պալատի նախագահը նշեց, որ Փաստաբանական դպրոցն ավարտելը հեշտ գործընթաց չէ, և փաստաբանության ոլորտում առաջին բարդ խնդիրը նրանց համար արդեն հաղթահարված է:

Սիմոն Բաբայանը փաստաբանական համայնքի նոր անդամներին մաղթեց բեղմնավոր և հաջողակ գործունեություն, ընդգծելով, որ իրենց գերնպատակը պետք է լինի Հայաստանի Հանրապետության Սահմանադրությամբ երաշխավորված մարդու իրավունքների ու օրինական շահերի պաշտպանությունը։

Ելույթի ավարտին Փաստաբանների պալատի նախագահը շնորհակալություն  հայտնեց Փաստաբանական դպրոցի տնօրենին և աշխատակազմին, Փաստաբանական դպրոցի  կառավարման խորհրդի անդամներին, Փաստաբանների պալատի խորհրդին, որակավորման հանձնաժողովին, որոնց ջանքերով կազմակարպվել և անց են կացվել ուսումնառության գործընթացը և որակավորման քննությունները: 

Հավակնորդներին շնորհավորեց նաև Փաստաբանական դպրոցի տնօրեն Արա Զոհրաբյանը:

Իր ելույթում Արա Զոհրաբյանը կարևորեց այն հանգամանքը, որ հավակնորդներից յուրաքանչյուրն իր ուժերով է ընդունվել, սովորել Փաստաբանական դպրոցում և հաջողությամբ որակավորման քննությունները հանձնելով ստացել փաստաբանի արտոնագիր, ինչը կարևոր է հետագա գործունեության ընթացքում։  Փաստաբանական դպրոցի տնօրենը բարի երթ  մաղթեց ապագա փաստաբաններին՝ հիշեցնելով նրանց մասնագիտական գործունեության ընթացքում կոռուպցիոն ռիսկերից զերծ մնալու և գործունեությանը սրտացավորեն մոտենալու մասին:

Շնորհավորական ուղերձներով հանդես եկան նաև Փաստաբանների պալատի խորհրդի անդամներ՝ Կարեն Մեժլումյանը և Մարինե Ֆարմանյանը: Նրանք վստահություն  հայտնեցին, որ ապագա փաստաբաններն ունենալու են իրենց ավանդը փաստաբանության զարգացման գործում:

Ելույթներով հանդես եկան նաև Փաստաբանական դպրոցի շրջանավարտները: Նրանք շեշտեցին, որ յուրաքանչյուր փաստաբանի հաջողություն համայնքի հաջողությունն է:

Ելույթներին հաջորդել են փաստաբանների հանդիսավոր երդման և արտոնագրերի հանձնման  արարողությունները: