ՀՀ փաստաբանների պալատն Ազգային պատկերասրահի Որմնանկարների սրահում նշեց փաստաբանի մասնագիտական օրն ու Հայաստանում փաստաբանության ձևավորման 104-րդ ամյակը:

   Երեկոյի ընթացքում նախատեսված էր Զանգվածային լրատվության միջոցների պարգևատրում և Փաստաբանական ակադեմիայի շրջանավարտներին՝ փաստաբանական գործունեության արտոնագրերի շնորհում:  

   Տոնական միջոցառումը սկսվեց Հայաստանի Հանրապետության օրհներգի ներքո:

  Ներկաներին ողջունեց և բացման խոսքով հանդես եկավ Փաստաբանների պալատի նախագահ Սիմոն Բաբայանը:

  Շնորհավորական ուղերձում Փաստաբանների պալատի նախագահը շնորհակալություն հայտնեց ՀՀ բոլոր փաստաբաններին՝ փաստաբանի դժվարին առաքելությունը հանձն առնելու և փաստաբանական համայնքի համբավն ու հեղինակությունը բարձր պահելու համար: 

  Խոսքն ուղղելով ապագա փաստաբաններին՝ Սիմոն Բաբայանը հորդորեց առաջնորդվել անկախությամբ, պարկեշտությամբ և արդարամտությամբ, ինչպես նաև գերնպատակ համարեց՝ ՀՀ Սահմանադրությամբ երաշխավորված մարդու իրավունքների ու օրինական շահերի պաշտպանությունը։

  Նա շնորհակալություն  հայտնեց նաև Փաստաբանական ակադեմիայի ռեկտորին և աշխատակազմին, Փաստաբանական ակադեմիայի  կառավարման խորհրդի անդամներին, Փաստաբանների պալատի խորհրդին, որակավորման հանձնաժողովին, որոնց ջանքերով կազմակերպվել և անց են կացվել ուսումնառության գործընթացը և որակավորման քննությունները: 

  Ողջույնի խոսքով և շնորհավորական ուղերձներով հանդես եկան նաև Փաստաբանական ակադեմիայի ռեկտոր Արա Զոհրաբյանը, Փաստաբանների խորհրդի անդամներ Մարինե Ֆարմանյանը, Կարեն Սարդարյանը և Գայանե Դեմիրչյանը:

  Իր ելույթում Փաստաբանական ակադեմիայի ռեկտոր Արա Զոհրաբյանը նշեց, որ փաստաբանի կատարելատիպը կամ փաստաբանի հավաքական կերպարը՝ խոհեմ, բարեխիղճ, համարձակ, արդար և զսպված մասնագետն է: Հավակնորդներին դիմելով նշեց, որ պետք է հեռու մնալ կոռուպցիայից, քանի որ կոռուպցիան վերացնում է փաստաբանի մասնագիտությունը:

 Փաստաբանների պալատի խորհրդի անդամներն էլ իրենց շնորհավորական խոսքում  ընդգծելով օրվա խորհուրդը՝ հույս հայտնեցին, որ փաստաբանական ինստիտուտը կշարունակի զարգանալ և ամուր լինել՝ շնորհիվ պրոֆեսիոնալիզմի և միասնականության:

 Այնուհետև ելույթ ունեցան նաև Փաստաբանական ակադեմիայի շրջանավարտներ Ջուլիետա Մանուկյանը և Ավետիք Հարությունյանը:

  Հաջորդիվ տեղի ունեցավ զանգվածային լրատվության միջոցների պարգևատրման արարողությունը:

  Փաստաբանների պալատի կողմից շնորհակալագրերով պարգևատրվեցին մի շարք լրատվամիջոցներ՝ փաստաբանական ինստիտուտի հետ ակտիվ համագործակցության, փաստաբանների հետ արդյունավետ աշխատանքի և իրավական ոլորտի խնդիրները պատշաճ լուսաբանելու համար:

  Ներկայացնում ենք պարգևատրվածների ցանկը․

1. Հայկական երկրորդ հեռուստաալիք «Լրաբեր» լրատվական ծրագիր
2. Կենտրոն Հ/Ը «Հանցանքի հետքով»  հաղորդաշար
3. Երկիր Մեդիա Հ/Ը «Երկրի լուրերը» լրատվական ծրագիր
4. 5-րդ ալիք «Հայլուր» լրատվական ծրագիր
5. Հայաստանի Հանրային ռադիո  « Ռադիոլուր» լրատվական ծրագիր
6. «Գորիսի Մամուլի ակումբ» ՀԿ
7. «Iravaban.net» կայք
8. «Armlur.am» կայք
9. «Hraparak.am» կայք
10.  «Hetq.am» կայք
11. «Aravot.am» կայք
12. «168.am» կայք

   Երեկոն ավարտվեց փաստաբանների հանդիսավոր երդման և արտոնագրերի հանձնման  արարողությամբ: Փաստաբանական համայնքը համալրվեց 85 նոր անդամներով: