ՀՀ Փաստաբանների պալատի նախագահ Սիմոն Բաբայանն ընդունել է  ԱՄՆ Միջազգային զարգացման գործակալության (USAID ՄԶԳ) Հայաստանի «Արդարադատության ոլորտի աջակցության ծրագրի» պատվիրակությանը՝ ծրագրի ղեկավար Մարկ Լասսմանի գլխավորությամբ:

Ողջունելով միջազգային գործընկերների այցը, Սիմոն Բաբայանը բարձր է գնահատել   ԱՄՆ Միջազգային զարգացման գործակալության աջակցությունը Հայատանի մի շարք ոլորտներում իրականացվող բարեփոխումներին, մասնավորապես՝ դատաիրավական բարեփոխումներին ուղղված:

Ծրագրի ղեկավար Մարկ Լասսմանը շնորհակալություն է հայտնել Փաստաբանների պալատի նախագահին՝ հյուրընկալության համար և խնդրել ներկայացնել այն մարտահրավերները, որոնց փաստաբանները հանդիպում են դատարանների հետ առնչվելիս:

Փաստաբանների պալատի նախագահ Սիմոն Բաբայանը ընդգծել է էլեկտրոնային արդարադատության միասնական կառավարման համակարգի ներդրման անհրաժեշտությունը, ինչպես նաև այլ քայլեր, որոնք էապես անհրաժեշտ են ՀՀ դատաիրավական համակարգի զարգացման համար: 

Հանդիպման ընթացքում քննարկվել են առաջնահերթ հարցերն ու ԱՄՆ ՄԶԳ-ի կողմից դրանց աջակցելու հնարավորությունները: 

Հանդիպման ավարտին կողմերը երկուստեք շնորհակալություն են հայտնել և ձեռք բերել պայմանավորվածություն՝ շարունակական դարձնել այս հանդիպումները՝ համագործակցության և երկխոսության ճանապարհով ցանկալի արդյունքների հասնելու համար: