ՀՀ փաստաբանների պալատում տեղի է ունեցել հանդիպում Ռուսաստանի գործընկերների հետ

11.11.2026 11:01

ՀՀ փաստաբանների պալատի նախագահ Սիմոն Բաբայանը և ՀՀ փաստաբանական ակադեմիայի ռեկտոր Արա Զոհրաբյանը հյուրընկալել են Ռուսաստանի Դաշնության փաստաբանների դաշնային պալատի նախագահ Սվետլանա Վոլոդինային և Պալատի նախագահի տեղակալ Օքսանա Սերգեևա Եվգենիևնային։

Փաստաբանների պալատ կատարած պաշտոնական այցի շրջանակում Սվետլանա Վոլոդինան հանդիպում է ունեցել նաև Հայաստանի փաստաբանների հետ, խոսել ռուսաստանյան փաստաբանության կայացման և զարգացման պատմության մասին, հայ գործընկերներին պատմական ակնարկով ներկայացրել Ռուսաստանի փաստաբանության համար նշանակալի փաստաբանների:

Հանդիպումը կրել է «Փաստաբաններին՝ փաստաբանների մասին» խորագիրը, որի առանցքում երկու երկրների փաստաբանական համայնքների գործընկերային հարաբերությունների ամրապնդումն ու փորձի փոխանակումն էր:

Ռուս գործընկերները շրջայց են ունեցել Փաստաբանների պալատի վարչական շենքի տարածքում, այցելել ՀՀ փաստաբանական ակադեմիա և Հանրային պաշտպանի գրասենյակ:

ՀՀ փաստաբանական ակադեմիայի ռեկտոր Արա Զոհրաբյանը Ռուսաստանի գործընկերներին ներկայացրել է Ակադեմիայի գործունեության և ուսումնական գործընթացի կազմակերպման առանձնահատկությունները, ինչպես նաև Ակադեմիայի դերը հայաստանյան փաստաբանության զարգացման գործում:

Հանդիպման ավարտին երկու երկրների գործընկերները բարձր են գնահատել գործընկերային փոխհարաբերությունները և կարևորել մասնագիտական կապերի ամրապնդումն ու համագործակցության շարունակական ընդլայնումը: