Հայաստանի Հանրապետության փաստաբանների պալատի և Արարատի մարզպետարանի միջև այսօր՝ 2014թ. հոկտեմբերի 16-ին, ստորագրվել է փոխըմբռնման հուշագիր:
Արարատի մարզում գործելու է ՀՀ փաստաբանների պալատի Արարատի մարզային համակարգողի գրասենյակը: Բացման արարողությանը մասնակցել են ՀՀ փաստաբանների պալատի նախագահ Արա Զոհրաբյանը, Արարատի մարզպետ Ռուբիկ Աբրահամյանը, ՀՀ փաստաբանական դպրոցի տնօրեն Սիմոն Բաբայանը, մարզային խնդիրների համակարգման գծով ՓՊ նախագահի տեղակալ Մելանյա Առուստամյանը, փաստաբաններ և մարզպետարանի աշխատակիցներ:
Արարատի մարզի գրասենյակ չունեցող փաստաբաններին Մարզպետարանը տրամադրել էր գրասենյակ, որը ՀՀ փաստաբանների պալատն իր միջոցներով կահավորել էր և ապահովել գույքով ու տեխնիկայով:
Փոխըմբռնման հուշագրի ստորագրումից հետո Արա Զոհրաբյանը և Ռուբիկ Աբրահամյանը մասնակցել են գրասենյակի բացման արարողությանը:
Փաստաբաններն այսուհետ Արարատի մարզում ամսական առնվազն մեկ անգամ անվճար իրավաբանական խորհրդատվություն են տրամադրելու մարզի բնակիչներին:
Երկու կառույցների ղեկավարներն էլ ողջունել են այս նախաձեռնությունը: Ռուբիկ Աբրահամյանն իր գոհունակությունն է հայտնել մեկնարկող այս ծրագրի առթիվ և հայտնել. ՙՎստահ եմ, որ Փաստաբանների պալատը կաջակցի մեր ազգաբնակչության իրավագիտակցության և իրավական մշակույթի զարգացման բարձրացմանը՚:
Փաստաբանների պալատի նախագահ Արա Զոհրաբյանը խոսելով Պալատի մարզային քաղաքականության մասին՝ նշել է. ՙԲոլորն էլ լավ գիտեն, որ մեծ մասամբ իրավական անցուդարձը կենտրոնացած է Երևան քաղաքում: Այս նախաձեռնությամբ փորձում ենք մեղմացնել մարզերում գործող փաստաբանների աշխատանքային խնդիրները՚:
Ապագայում ՀՀ փաստաբանների պալատը նախատեսում է նաև հեռավար ուսուցում կազմակերպել մարզերի փաստաբանների համար: Փաստաբանների վերապատրաստումը իրականացնելու է ՀՀ փաստաբանական դպրոցը: Խոսելով վերապատրաստման կարևորության մասին՝ ՀՀ փաստաբանական դպրոցի տնօրեն Սիմոն Բաբայանը նշել է. ՙԻնչպես հայտնի է, յուրաքանչյուր փաստաբան պետք է վերապատրաստվի 24 ժամ և այս առումով խնդիր էր առաջանում մարզերի փաստաբանների համար Երևան գալը: Մոտ ապագայում վերապատրաստումները կիրականացնենք հեռավար ուսուցմամբ՚:
Հիշեցնենք, որ ՀՀ փաստաբանների պալատի նախագահ Արա Զոհրաբյանը 2014թ. հունվարի 23-ին, հանդիպել էր Արարատի նախկին մարզպետ Արամայիս Գրիգորյանին և երկուստեղ ձեռք էր բերվել պայմանավորվածություն՝ համագործակցության այս ձևաչափի մասին։
Արարատի մարզում գործում է ընդհանուր 19 փաստաբան, այդ թվում՝ Արտաշատ քաղաքում 9 փաստաբան, Արարատ քաղաքում 3 փաստաբան, Վեդի քաղաքում 4 փաստաբան և Մասիս քաղաքում 3 փաստաբան։