Այսօր ՀՀ փաստաբանների պալատի վարչական շենքից մեկնարկել է փաստաբանների երթը դեպի Հայաստանում ԵՄ պատվիրակության գրասենյակ:

Երթը նպատակ ուներ հանրության և միջազգային կառույցների ուշադրությունը հրավիրել վերջին շրջանում ոստիկանության ծառայողների կողմից փաստաբանների նկատմամբ կիրառվող բռնության դեպքերի առնչությամբ, ինչպես նաև հանրային իրազեկման եղանակով հասնել համապատասխան կառույցների պատշաճ արձագանքին և կանխարգելել նմանատիպ դեպքերը:

Հիշեցնենք, որ վերջին նման դեպքը տեղի էր ունեցել 2023թ. հունիսի 7-ին, երբ ՆԳՆ Ոստիկանության Երևանի քաղաքի վարչության Կենտրոն բաժնում ոստիկանության մի խումբ ծառայողներ ծեծի էին ենթարկել փաստաբան Կարեն Ալավերդյանին, նրա նկատմամբ կիրառել ձեռնաշղթաներ և արցունքաբեր գազ, ինչպես նաև ձերբակալել էին և խուզարկության ենթարկել:

ԵՄ պատվիրակության ընտրությունը հատկանշական էր եվրոպացի գործընկերներին իրազեկելու առումով, որ ՀՀ դատաիրավավական բարեփոխումների ֆինանսավորման համար հատկացվող ԵՄ միջոցներն ուղղվում են փաստաբանների նկատմամբ բռնարարքներին։

Երթի մասնակից փաստաբանները նշված հարցով ԵՄ պատվիրակությանը ներկայացրեցին նաև գրավոր դիմում:

Հանրային իրազեկման նմանատիպ գործողությունները, ինչպես քննարկվել և արձանագրվել է 2023թ. հունիսի 13-ին տեղի ունեցած փաստաբանների ակումբի նիստի արդյունքներով, լինելու են շարունակական՝ մինչև նիստի արդյունքներով արձանագրված պահանջների իրագործումը պատկան մարմինների կողմից: